Aprel döyüşlərində böyük şücaətlər göstərmiş polkovnik-leytenant Raquf Orucov ən zəngin döyüş bioqrafiyası olan hərbi hissə komandirlərindən biri idi. Onun düşmən arxasında həyata keçirdiyi bir neçə xüsusi əhəmiyyətli əməliyyatlar hərb tariximizdə özünəməxsus yer tutur. Təsadüfi deyil ki, hələ sağlığında ikən onu əfsanəvi qəhrəman, “Murov qartalı” hesab edirdilər. Kəşfiyyatçı zabit şəhid olduğu günədək bir çox mükafatlara, ölümündən sonra isə “İgidliyə görə” medalına layiq görülüb.

Cəsur kəşfiyyatçının ən böyük arzularından biri övladlarının diplomat təhsili alıb Qarabağ həqiqətlərini dünya ictimaiyyətinə çatdırması idi. R.Orucov şəhidliyə qovuşandan sonra oğlu Aqşin onun bu arzusunu həyata keçirmək istəyib və hazırda “ADA” Universitetində təhsil alır.

ASAN Radio xəbər verir ki, bu barədə “ADA” Universitetinin Tələbə Şurası və “Aprel şəhidləri 2016: şəhid ailələrinə dəstək” İctimai Birliyinin birgə təşkil etdiyi tədbirdə danışılıb.

“ADA” Universitetində keçirilən tədbirdə Tələbə Şurasının sədri Qoşqar Qədimbəyli, qəhrəmanın oğlu Aqşin Orucov, Milli Məclisin deputatı Qənirə Paşayeva Aprel döyüşlərinin əhəmiyyətindən və həmin döyüşlər zamanı xüsusi rəşadət nümunəsi göstərən Raquf Orucovun igidliyindən bəhs ediblər.