Bakıda keçiriləcək futbol üzrə UEFA Avropa Liqasının final oyunu zamanı nəqliyyat əməliyyatlarının yerinə yetirilməsi məqsədilə 450-dək avtobusa 12 məntəqədə Bakı Nəqliyyat Agentliyinin (BNA) tam heyəti və özəl daşıyıcaların 62 nəfər dispetçeri cəlb edilib.

ASAN Radio xəbər verir ki, bu barədə Bakı Nəqliyyat Agentliyinin ictimaiyyətlə əlaqələr və maarifləndirmə şöbəsinin müdiri Mais Ağayev deyib.

O bildirib ki, futbol matçını izləməyə gələcək azarkeşlərin daşınması üçün BNA tərəfindən nəqliyyat planı hazırlanıb, plana əsasən, müxtəlif istiqamətlər üzrə marşrutlar müəyyənləşdirilib. Həmçinin Bakı Olimpiya Stadionunun ərazisindəki nəqliyyat terminalının və şəhərin müxtəlif ərazilərində məntəqələrin layihəsi hazırlanıb və bu sahədə müvafiq işlər görülüb.

M.Ağayev qeyd edib ki, hava limanı ərazisində təyyarənin trapından azarkeşlərin gömrük və sərhəd-keçid məntəqələrinə daşınması üçün 40 avtobus ayrılıb.

Futbol üzrə UEFA Avropa Liqasının final oyunu ərəfəsində akkreditasiya olunmuş şəxslər mayın 25-dən 30-dək ictimai nəqliyyatdan, biletli azarkeşlərin isə mayın 28-dən 30-dək kart sistemi ilə işləyən marşrutlardan ödənişsiz istifadə edəcəklər.

Mais Ağayevin sözlərinə görə, eyni zamanda, oyun günü ictimai nəqliyyat gücləndirilmiş iş rejimində fəaliyyət göstərəcək. Çarter reysi ilə ölkəmizə gələcək Arsenal və Çelsi azerkeşlərinin aeroportun "Terminal-1" və "Terminal-2" ərazisindən müvafiq olaraq Bakı Olimpiya Stadionuna və Bakı Nəqliyyat Agentliyinin "Depo-2" ərazisinə təqdim edilən siyahıya uyğun daşınması "AFN transport" şirkəti tərəfindən həyata keçiriləcək və koordinasiya olunacaq.