Zəngin təbiəti, musiqisi, mədəniyyəti, abidələri ilə tanınan Qarabağ diyarı atları ilə də məhşurdur. 

Qarabağ atları dünyada mövcud cinslərdən qızılı-kürən rəngi, uzaq məsafəyə çoxnəfəsliliyi ilə seçilir. Sahibinin əmrindən çıxmayan, tez əhliləşdirilən, sadiq dostdur.

Hələ 20-ci əsrin sonlarına qədər Ağdamda atçılıq zavodu fəaliyyət göstərib. 90-cı illərdə erməni təcavüzü tək torpaqlarımıza qarşı deyil, həmçinin, milli sərvətlərimizin talanına yönəlmişdi. Ağdamın kəndləri erməni silahlıları tərəfindən işğal olunsa da, Qarabağ atlarını özününküləşdirmək cəhdləri boşa çıxdı. Cins atları ermənilərin cəngindən qurtaran şəxslərdən biri Qarabağ Atçılıq Kompleksinin direktoru Maarif Hüseynovdur:

"Demirəm ki, mənə ad versinlər, amma qəhrəmanlıq etmişəm, atları ermənilərdən qorumuşam. Həm bir hərbçi kimi, həm də zavodun işçisi kimi əlimizdə silah vuruşduk, Qarabağ atlarını bura gətirə bildik."   

İndi Qarabağ atlarının genefondunu qorumaq, dünyadakı şöhrətini artırmaq əsas vəzifələrdəndir. Kənd Təsərrüfatı nazirliyinin təşkil etdiyi media tur çərçivəsində Qarabağ Atçılıq Kompleksi ilə tanışlıq ASAN Radio olaraq, bizdə ayrı maraq yaratdı. Hazırda mərkəzdə 245 baş at var.  

Dilan, Şan, Şair, Armud... Baş zootexnik Yaşar Mirəliyev atlara qoyulan ad seçiminə belə aydınlıq gətirir: "Yaxşı olar ki, insan adı olmasın, yer, məkan adları seçirik. Məsələn, 2019-cu ildə aldığımız ilk balaya yaşadığımız kəndimiz Ağdamın Eyvazxanbəyli kəndinin adını verdik."

Sonra manejdə Qarabağ atlarının məharətinə də bələd olduq. Çaparlardan biri Bayram Quliyevdi; Qarabağ atlarına qürurla xidmət edir. Atlarla "dil tapa" bilib. 

Azərbaycanın Qarabağ atları hazırda Ağcabədi rayonunda köçkün həyatı yaşayır.  Həm də yaşadır - Azərbaycanın Qarabağ bölgəsinin adını, - beynəlxalq, yerli tədbirlərdə, yarışlarda, cıdırda. Cıdır düzündə çapmaq isə hələ ki, arzudur. Gerçəkləşməsi üçün igidlərin meydanda at oynatması lazımdır.

Xüsusi olaraq Ağcabədidən reportajı hazırladı: İlkin Kərimov, montaj: Zamiq Babayev.

Audioreportajı linkdən dinləyin:

http://bit.ly/2JARm92