Gecə Ermənistan silahlı qüvvələri Azərbaycan Ordusu bölmələrinin yerləşdiyi mövqeləri və yaşayış məntəqələrimizi müxtəlif silahlardan, o cümlədən artilleriya və raketlərdən atəşə tutub. Müdafiə Nazirliyindən ASAN Radioya verilən məlumata görə, döyüş əməliyyatları əsasən cəbhənin Ağdərə, Xocavənd və Qubadlı istiqamətlərində davam edib.  Cavab tədbirlərimiz nəticəsində düşmən tərəfdən xeyli ölən və yaralanan var. Eyni zamanda ermənilər texnika sarıdan xeyli itki veriblər.

Bu gün səhər saat 06:00-dan etibarən isə Ermənistan silahlı qüvvələri Tərtər, Ağdam və Ağcabədi rayonlarının ərazisini artilleriya atəşinə tutub. Müdafiə Nazirliyinin digər məlumatına görə, düşmən Ağcabədi rayonunun Qiyaməddinli kəndini də atəşə tutub. Dağıntı və xəsarət alanlar yoxdur. Bundan başqa,  Ermənistan müdafiə nazirliyinin yaydığı daha bir məlumat təkzib edilib. Belə ki,  Azərbaycan Ordusunun Qafan şəhəri yaxınlığındakı David Bek kəndi istiqamətində döyüş əməliyyatları aparması barədə erməni mətbuatının yaydığı məlumat həqiqətə uyğun deyil. Ordumuz Qubadlı ərazisini artilleriya atəşinə tutan düşmənin nöqtələrinə cavab atəşi açıb.