ASAN Radio xəbər verir ki, bu gün Beynəlxalq Muğam Mərkəzində "Bakı Beynəlxalq Caz Festivalı"nın ikinci günü keçiriləcək. 

Bu tədbir Mədəniyyət və Turizm Nazirliyinin təşkilatçılığı ilə keçirilir.

Xüsusi vurğulamaq lazımdır ki, ilk dəfə olaraq Beynəlxalq Muğam Mərkəzində keçirilən tədbir radio vasitəsilə canlı yayımlanır və bu canlı yayımı eksklüziv olaraq ASAN Radionun efirindən hər kəs dinləyə bilər.

ASAN Radio “Bakı Beynəlxalq Caz Festivalı”nın rəsmi informasiya tərəfdaşıdır.

bakujazzfestival.com saytının verdiyi məlumata əsasən, saat 19:00-da başlayacaq konsertdə İspaniyadan olan saksofon ustası Antonio Lizananın solisti olduğu qrup çıxış edəcək.

Antonio Lizana 10 yaşından etibarən Kadiz Musiqi Konservatoriyasında bu alətdə ifa etməyi öyrənməyə başlayıb.

Onun caz sənəti ilə yaından tanış olması və bu musiqini sevməsi Cerri Berqonzinin, Dik Oatsın, Cim Snideronun və Perico Sambitin caz üzrə verdikləri müxtəlif seminarlarda iştirak etdiyi dövrlərlə üst-üstə düşür.

Qeyd edək ki, oktyabr ayının 30-dək Azərbaycanın paytaxtı Bakı şəhərində “Bakı Beynəlxalq Caz Festivalı” keçirilir.