Bu gün BMT-nin İnkişaf Proqramının həyata keçirdiyi  Cənubi Qafqazda Qadınların İqtisadi Səlahiyyətlərinin Artırılması layihəsi çərçivəsində İsveçrə Dövlət Şurasının Prezidenti Jan Rene Furnierin Xəzər rayon Qadın Resurs Mərkəzinə səfəri baş tutdu.   ASAN Radio bildirir ki, layihə İsveçrənin İnkişaf Əməkdaşlığının maliyyə dəstəyi ilə Azərbaycan Hökuməti, BMT-nin İnkişaf Proqramı və BMT-nin Gender Bərabərliyi və Qadınların Səlahiyyətlərinin Artırılması Qurumu tərəfindən birgə həyata keçirilir.   Tədbiri giriş sözü ilə Xəzər rayon İcra Hakimiyyətinin başçısı Elşən Salahov açaraq daha sonra tədbir iştirakçılarını salamlamaq üçün sözü Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, Isveçrə Dövlət Şurasının Prezidenti Jan Rene Furnier və BMTİP-in Azərbaycan ofisinin Rezident Nümayəndəsi Alessandro Frakasettiyə verdi. İsveçrə Konfederasiyasının Azərbaycanda səfiri xanım Muriel Peneveyre də tədbirdə çıxış edərək qadınların ictimai və iqtisadi həyatda fəal iştirakı üçün geniş imkanların yaradılmasının vacibliyinə toxundu. Daha sonra layihənin rəhbəri Gülarə Hümbətova çıxış edərək Cənubi Qafqazda Qadınların İqtisadi Səlahiyyətlərinin Artırılması layihəsi çərçivəsində Azərbaycanda görülən işlər və əldə olunan nailiyyətlərdən danışdı. Səfər zamanı qonaqlar İsveçrə hökumətinin maliyyələşdirdiyi bu layihənin dəstəyi ilə sahibkarlıq fəaliyyətinə başlayan qadın sahibkarların istehsal etdiyi məhsullarını nümayiş etdirən stendləri ziyarət ediblər.