Bu gün Vətən müharibəsində şəhid olan hərbi qulluqçularımızın xatirəsini anım günüdür. Prezident İlham Əliyevin imzaladığı sərəncama əsasən canlarını Azərbaycanın ərazi bütövlüyü uğrunda qurban vermiş şəhidlərin əziz xatirəsi bu gün saat 12:00-da bir dəqiqəlik sükutla yad ediləcək. Vətən müharibəsində Silahlı Qüvvələrimizin 2 783 nəfər hərbi qulluqçusu şəhid olub. Onların sırasında 103 nəfər hərbi qulluqçunun DNT analiz metodu ilə şəxsiyyətinin müəyyən edilməsi üzrə işlər davam etdirilir. 100 nəfərdən artıq hərbi qulluqçumuz isə itkin düşmüş hesab olunur. Onların tapılıb ailələrinə məlumat verilməsi üçün zəruri tədbirlər görülür. Hazırda 1 245 nəfər hərbi qulluqçumuzun tibb müəssisələrində müalicəsi davam edir. Allah şəhidlərimizə rəhmət eləsin, ruhları qarşısında baş əyirik. Yaralı hərbi qulluqçularımıza şəfa diləyirik.

Şəhidlərimizin anım günü ilə əlaqədar ölkədə bir sıra tədbirlər keçiriləcək. Şəhidlər xiyabanına ziyarət təşkil olunacaq. Məscidlərdə, kilsələrdə, sinaqoqlarda şəhidlərin ruhuna dualar oxunacaq, Heydər Məscidində vəhdət namazı qılınacaq. Heydər Əliyev Mərkəzi, Fairmont oteli üzərində görüntülər nümayiş etdiriləcək.  ASAN Radio tədbirlərə qatılaraq, anım günüylə bağlı  məlumatları çatdıracaq.