Azərbaycan Yazıçılar Birliyində Əsir və itkin düşmüş, girov götürülmüş vətəndaşlarla əlaqədar Dövlət Komissiyası tərəfindən nəşr edilmiş “Qətl edilmiş uşaqlar” kitabının təqdimat mərasimi olub. Bu barədə ASAN Radio xəbər verir.

Tədbiri giriş sözü ilə açan Yazıçılar Birliyinin sədri, xalq yazıçısı Anar Dağlıq Qarabağ münaqişəsi zamanı qətlə yetirilən Azərbaycanlı uşaqlardan bəhs edən kitabın ciddi əhəmiyyət daşıdığını vurğulayıb.

Əsir və itkin düşmüş, girov götürülmüş vətəndaşlarla əlaqədar Dövlət Komissiyasının işçi qrupunun rəhbəri İsmayıl Axundov “Qətl edilmiş uşaqlar” kitabının müharibə qurbanları ilə bağlı məsələlərin və ermənilər tərəfindən humanitar normaların pozulması faktlarının öyrənilməsində böyük əhəmiyyət daşıyıdığını qeyd edib.

O bildirib ki, Ermənistan  Respublikası  “Müharibə qurbanlarının müdafiəsinə dair” 1949-cu il tarixli Cenevrə Konvensiyasının tələblərini kobud surətdə pozaraq Azərbaycan vətəndaşlarına qarşı məqsədli terror, soyqırım, etnik təmizləmə siyasətini irəli sürüblər.

Tədbirdə iştirak edən Yazıçılar Birliyinin birinci katibi, xalq şairi Fikrət Qoca, xalq şairi Nəriman Həsənzadə, millət vəkilləri Nizami Cəfərov və Aqil Abbas, xalq yazıçısı Mövlud Süleymanlı, Yazıçılar Birliyinin katibi Rəşad Məcid də kitabın əhəmiyyətliyindən danışaraq, bir neçə dilə tərcümə olunması təkliflərini də irəli sürüblər.